CNLD an campaign policy le an bia chim zoh tik ah politics khuaruahnak mit in zoh setmat lo cun ṭihnung dirhmun ah an kan phakpi kho. A bik in an chairmen pathum hna an dirhmun le an bia chim zoh tikah kan miphun nih nunnak pek in kum 70 chung rak doh cang mi Ralkap le USDP fekṭhup in an dirkamh hnaning fiang tein hmuh khawh a si. Cucu kan miphun caah tih a nun tuknak zawnte a si.

Pu Zing Cung nih a rak chim ka theih bal mi cu miphun pakhat nih ram kong ah step pakhat kan I palh sual ah cun chanchung a rau kho a rak ti bal. CNLD chairmen pathun hna nih an ipalh mi cu kum 70 nunnak pek in kan doh mi hna ralkap le USDP lei ṭang lak in NLD tu thihthih nunnun in a doh mi hi a si. Ram khel ahcun ruling party a si mi cu doh phung a si ko. Asinain ram mi nih kan dohmi hna Ralkap le USDP he cozah ser an itimh ko hi cu a poi tuk pin ah ṭih zong a nung.
Pu Ngaisak hi a hramthawk ah cun Tlangcung ah tlang party kan tling lai i rawn ah NLD tling ve ko hna seh tiah a rak aupi. A hramthawk a bia le atu kar a bia chim a dang ngaingai cang. Pu No Thang Kap le Pu Zo Zam cu tampi chim hau lo 2015 liote in USDP nih camping tuahnak caah fund pek mi hna an si. Amah pahnih hi cu USPD dirhkamtu( back bone), anmah misa minung cia an rak si.


The Chinland post nih Chin State USDP chairman Dr. Hmuh Thang interview an tuah lioah CNLD le USDP cu election campaign ah kan ṭangṭi lai fiangte in a chim. Cu bia cu a tak in kan hmuh cang mi cu CNLD chairman hna an i cuhnak mee hmun poah cu USDP nih a kianh hna. Cu lawng siloin Hakha, Falam le Matu ah CNLD cu USDP nih zeimawzat hmunhma an kianh rih hna.

Anmah party pahnih cu election result a chuah hlan , party campaign hrim in coalition policy an ngeih cia cang ti cu an bia chim le an tuahsernak nih fiang tein a langhter cang. Kayah State kan zoh ah cun KNP le KYSDP zong pakhat le pakhat hmunhma an ikian ko hna. Annih cu mizapi sin ah ṭha tein chim fiannak an tuah. Chin State USDP chairman nih CNLD le USDP cu kan ṭangṭi lai tiah mizapi sin ah chim fiannak a tuah ko. Nain CNLD chairmen hna nih cun mizapi nih an theih sual tiah an thuhkanh. Cun mizapi hlen an kan timh.

Tutan thimnak hin USDP nih campaign caah fund pek ding in offer an tuah rih kho men hna dah! An cohlan le cohlan lo, cun a chungbia cu anmah Chairmen hna lawng nih an theih lai dah! Zeicahtiah 2015 lio ah khan CNLD chairmen pahnih le atu lio PM ai cuh timh mi zeimawzat cu USDP nih fund an rak pek cang hna. Catialtu: Ngun Nawl Lian

Note: Mipi Sinah Lawmhnak le Zaangfah nawlnak: Ka thawngpang (News) ka ttial mi a rel mi vialte mipi nan dihlak cungah ka lunglawmnak nan sinah ka langter. Ka thawngpang ttialmi na kan rel piakmi ruangah keimah zong thawngpang a dikmi le a hmanmi ka post khawhmi a si. Thawngpang kan tial mi hi kan Mipi caah tha hnemnak a chuahpi ding tial hi a pakhatnak ah kan i timh bikmi a si.

Thawngpang (News) kan lakmi hi thatein source dang ka zoh hnuah mah hi cu a hmanmi a si lai tiah ka ruah mi hna hi ka miphun a si mi “Chinmi” caah tial khawh le theihter khawh ka rak I zuam. Asi nain vawlei cung cu tlamtlinglonak a si caah Source ka lakmi ah a hman lo mi zong a um kho caah cu a hmang lo mi a si tiah nan theih mi cu zeitik caan poah ah ka theihter uhlaw keimah ca zongah ralrinnak caah a si lai i cu thawngpang a hmanmi le a dik mi cu remh le tial khawh kan i zuam cawlh than ko lai. Cu caah ka Miphun hawi hna nangmah bawmhnak zong ka herh hringhran. Thawngpang tial piak na duh sual zongah zeitik caan poah ah tial piak khawh zong na si tiah Zaangfah nawlnak he- Lungleng Tlang Editor.

By Chuncha