Rom. 11:25 rel ta hna u sih. Ka u le ka nau hna, biathli pakhat nan hngalh awk i ka duhmi a um. Cu nihcun ka fim tiah i ruat loin an umter hna lai. Cu biathli cu hihi a si: Israel mi lung khohkhal i an um hi zungzal ca in a si lo, Jentail mi an dihlak PATHIAN sin i an rat caan tiang ca lawng a si lai.

Luka. 21:24 mizo le Lai in rel rih usih. Tin, Jentail hun a kin hma loh zawng Jerusalem chu ( cu ) Jentail te rah behin a awm ang. Jentail mi nih Jerusalem khua cu an naan lai i an caan a dih hlan tiang an ke tangah an chiah lai.

KHRIH-ah Dawtmi u le nau hna, BAWIPA JESUH a ra deng cang, a kan lak deng cang, Velngeihnak caan, Khrihfabu caan a dih deng mang cang. Jentailmi hna caan a dih deng, Israel mi hna caan a phan dengmang ve cang. THIANG THLARAU toih an si deng ve cang.

A cunglei Bible kan rel mi Luka. 21:24 i “Jentail caan timi le Jerusalem cu an ke tangah an chiah lai,” tiah, kan relmi khi a tlinnak hnga aa hnin cang, UN ram, vawleicung ram hna nih Jerusalem cu Israel khualipi a si an ti duh lo, hihi Jentail ke tang chiah cu a si i, US le ram tlawmpal nih Israel nih ram an hun ngeih țhannak kum 70ah Jerusalem cu Israel khualipi a si tiah an cohlan cang. Cucaah, Luka. 21:24 i Jentail caan cu a dih deng i Rom. 11:25 i Israel mi hna lung khohkhal i an um caan hi a dih deng cang ti kha kan hngalh khawh.

THIANG THLARAU nih lam tampi le vawleicung hmun tampi ah JESUH a ra deng cang, Khrihfabu, zumtu hna lak kan si deng cang, Zaangfahnak caan a dih deng cang ti kha a mi hna hmangin a phuan lengmang.

2020 Feb, Hakha Crusade kan tuah lio, Zapi pumh lioah Langhnak an hmuh i BAWIPA JESUH cu Suiluchin aa chinh i rang raang aa cit i rat awkah timhcia tein a um cang ti an hmuh. kan nau pa Evan pakhat zong zan khuadei thla a cam lio ah, Tlangcungah Ni a tla deng cang mi kha a hmuh i cu Ni ahcun khaw dawmnak pi zong a hmuh chih. Rai a tlun hlan kha a si i, “Vawleicung ah nan duh lo tukmi harnak ka tlunter lai,” a ka ti a ti. Jentail hna ni, Vel- ngeihnak caan, Khrihfabu hna kan caan hi Ni bantukin a tla dengmang cang.

BAWIPA JESUH Khawdawm cungin zumtu hna lak/cawi awkah a rat hi kei zong Voihnih Langhnak in ka hmuh cang. Cucu Thianglawr kan timi cu a si. THLARAU-in hrințhan a si i taksa in a nungmi paoh lak/cawi kan si lai. US, Canada, Europe ram te hna, Australia, Japan le Korea te hna ah thlatla tuk i nan um kha, BAWIPA nih an tinhpiak mi hna ning a si lo. KHRIH JESUH chung tu-ah nan hna ngam ko seh. Vawlei hi a rawk cikcek te lai. A rawk kho lomi khua le ram Kan PA le kan PATHIAN nih a kan timhpiak.

A tu lio a tlungmi rai hnu ahhin, Jentail hna caah PATHIAN Zaangfahnak a donghnak bik rawlțuan, THIANG THLARAU toihnak, Nihmanung bik țhanghnak hi BAWIPA nih a kan peek lai tiah kan i ruahchan ngaingai. Tlawmte lawnglawng caan hi a um cang ee! PATHIAN nih THIANG THLARAU pekmi dawtnak in in khahter ko hna seh.

Apostle Tluang Lian ( Martar)

 

By Chuncha