Arpi Tap caan, Sahngar Nih caan: 2008 Phunghrampi sining hi minung tampi nih an hngalh lo, minung tampi nih an hngalh ko nain an buaipi duh ti lo. Kum 5 tal kan cawlcang khawh ahcun a za ko. Kum nga chung rampi budget kan hman khawh ve ahcun a timi zong an um ve. 2008 Phunghrampi ruangah ramkulh (state) cozah cu miphun party nih tlaih khawh a si lo.

2008 phunghrampi ruangah federal democracy timi biafang zong hman khawh a si lo. A chan cu hi phunghrampi ah Federal kong a tel lo. Miphun Covo lak khawhnak biafang zong a um lo. 2008 phunghrampi ah Daihnak biafang a um lo. Hluttaw Lengin ceihnak lam kan kawl lai tiin National Ceasefire Agreement (NCA), Union Peace Conference, (UPC) tehna an tuahpi. Ram uknak kong he pehtlaiin zei bantuk Agenda hmanh 2008 Phunghrampi lengin chuakpi khawh a si lo.

Chuakpi zongah ralkap Aiawhtu pawl nih 2008 phunghrampi chung lawngin agenda nan tuah khawh ti peng si ko. Tlangcungmi zong rawnmi zong aho poh nih kan duh bikmi cu – Tlangcungmi hriamtlaih pawl le ralkap pawl dohnak ruangah inn le lo ngei ti loin ramtang ah a thupmi ralzam pawl an um ti lo dingah kan ram ah daihnak um cang seh, Federal Democracy zong um cang seh ti hi a si.

Kan ram ah remhdaihnak um lo țha a si ti lo, daihnak um cang seh tiah Daihnak Hla zong an sak lengmang. Mipi zong kan duh tuk ve nain nihin tiang daihnak a um kho lo, remhnak a um kho lo. Federal zong hmuh khawh a si lo. Aho ruangah kan ram ah ralzam an um? Sifak kan si? Daihnak a um lo? Ralkap ruang lawngte a si. Hluttaw Lengin thil țha pakhat hmanh a chuak lai lo. Kum 60 dengmang chung vawlei tang ummi manfakmi Lung, sui le ngun vialte ralkap kut tangah an um dih.

Vawlei cung mansungmi thingkung le ramkung vialte ralkap uk an si dih. Minung caah thil tha vialte cu ralkap kut tangah an um dih. General Administration timi uknak vialte ralkap nawlpekmi lawng an si. Mipi le UNO zumh awktlak dingah ralkap nih Kachin ramkulh ah daihnak ka tuah tiah phuannak a ngei lioah Shan ram ah buainak a tuah. Shan ramkulh ah daihnak ka tuah a ti lioah Rakhine ramkulh ah buainak a tuah. Ralkap tuahmi poh palh zong palh lo zong action lak khawh a si lo. Tazacuai khawh zong a si lo. 2008 phunghrampi nih ralkap hi a dirkam dih.

Sakap thiampa nih sa kap a duh tikah ram a vaih bantukin ralkap nih eidin kawl a duh tikah buainak a tuah tawnmi a si. Ramsa a umnak hmun ah ram vaih a si tawn bantukin manfakmi thil umnak hmun, Shan ram, Kachin ram lei hi buainak tambik a tuah tawnmi a si. Kan ram ah nihin tiang daihnak a um kho lomi hi Ralkap caah ramvaihnak hmun țha a si caah a si.

2008 Phunghrampi a um chung cu ralkap caah nihnak canțha a si rih lai, mipi caah nih caan a phan tikah cun Ralkap caah tapnak caan a si ve lai. Atu hi mipi kan tap lio caan a si, mipi nihnak caan kan phak dengmang cang. Kan dihlak nihnak caan kan hmuh khawh nakhnga NLD hi tanh cio usih. Arpi = mipi Sahngar = ralkap, (15.9.2020) Catialtu: Laiki Chozah

Note: Mipi sinah lunglawmhnak le zaangfah  nawlnak: Thawngpang {News}kan tialmi a kan relpiak tu kan Miphun Chin/Laimi nan dihlak cungah lunglawmhnak tampi chim cawklo kan ngei. Thawngpang kan tialmi nan kan relpiaknak thawngin a dikmi le a hmaanmi thawngpang {News} kan thlah{Post}khawh hi mipi nan thawngin asi.

Thawngpang  kan tialmi hi careltu mipi caah thathnemnak si hram seh tihi kan itinhmi asi. Chirhchanh {Source} kan lak hnu ah a dik mi asi lai tiah kan ruah mi kha kan Miphun Laimi {Chinmi} nih fawizang tein kan theih khawh cio nakhnga theihter khawh kan i zuam. Asinain vawleicung cu tlamtlinlonak a si caah chirhchanh {Source} kan lakmi tete hi a dik lomi a um khawh caah a dik lomi thawngpang a si tiah nan ruahmi kha zeitik caan paoh ah theihter khawh kan si i, kanmah lei zong in a dikmi thawngpang tial khawh le kan palhmi remh khawh kan i zuam lai.

Mipi nih theih le hngalh ve hna seh ti na duhmi, thawngpang {News} siseh, Pathian bia siseh, siaherhnak bia in siseh, capar biazai le theihtlai pawl tialpiak ding a um ahcun zeitik caan poah ah tialpiak le thlahpiak khawh zong a si. Nan dihlak cungah lunglawmhnak le zaangfah nawlnak he- Lungleng Tlang Editor.

By Chuncha