A Ruh Langko Sim Mai Sehla; 2020 rampi hrilawknak ah, Chin ram ah NLD an cah ih, an lal a sile, hipawl hi thil umdan ding cu si: 1. Lamzin an tuah peh vivo ding. Mam ziaiziai in an tuah thei tla si mahna. 2. Lilawn le tidai, meisa tivekpawl an tawlrel sunzom ding an tuah kelten. 3. Surbung airport sunzom in an thuam mawi sinsin ding. 4. Lai khawte lam hrang thansohnak khal an tuah sunzom ding. 5. Eiruknak le leiram thu khal nasa sin in buainak a um ding. 6. Ramsung kahawknak khal a luar sinsin thei fawn.

7. Raltlan(refugees) le mithi, inn le lo urkang saknak khal a karh sinsin thei fawn. 8. Ramsung ral daihnak um loin, tlangmi mahte mai ram ih thuneih theinak lamzin khal khoh sinsin dingin a tuah ding. 9. Miphun damnak aupi le Chin ramri thu, leiram thu khal a buai sinsin dingih, kawl kutah thuksin in Chin kan lut sinsin ding. 10. Phyu miphun bangin kawl ah kan cang lan vivo dingih, miphun hlo le vai kan si sinsin ding.

11. Kawl ruahdan le, anmah miphun dinhmun vekih thuruat kan karh sinsin thei fawn. 12. Chin nunmawi, nunphung le calai, biaknak le leiram thu khal buaipitu an um nawn lo ding ih, kawl cozah ta, kawl uk simaw kan si timi ruahnak, ruahdan Chin mipi lungthin ah a khat sinsin dingih~ cutin, Chin cun hlohralnak thlankhur kan pan sinsin ding.

Asinan, CNLD in Chin ram ah cak in, Lalnak a co asile, hipawl hi a thleng ve thung ding: 1. Kawl hruaitupawl an thin a phang ding, an mang a bang nasa ding. 2. Chin miphun cu, kawl in an thinlung thupten tihzah upatnak in nei cih ding~ a lulu in. 3. Chin MP pawl thawn Central lamih Chin thuhla, Chin affairs reltlang an phur zet dingih, khat le khat zohniamnak lungthin um loin tuanpi tiah mi an ruat cih thei ding. 4. Chin MP pawlin Central lamah Chin miphun tulmi le, thil umdanpawl thawveng tak le mithmai nei zetin an duhmi thu an bur surso ngam mai ding.

5. Chin miphun ramri, leiram thu, tong le calai thu, tlawng cazir ding thu tiangin an buaipi thei ding. 6. Chin miphun biaknak thu, biak inn sak thu khalah awl samten an tifel cih mai ding. 7. Chin ram ah #purang hnakin, #Cross a tam sinsin ding ih, Chin ram ah Chin ca thawn cazir, cangan, lamzin tlun catar tiang le hmin ngan thu khalah Chin ca rori ih ngan thei ding kha, za ah za rorin in zuampi rupro thei ding.
8. Chin NLD pawlih aupi thei lomi, Chin NLD pawlih tongsuak dah lomi, Chin NLD pawlih simrel dah lomi,Chin NLD pawlih rel ngam dah lomi Chin miphun thu, Chin ramri thu, Chin leiram thu le tong calai thu tivekpawl hmaisong ciamco tul nawn loin an ruahrelpi dingih, cupawl atakin an aupi rupro thei ding a si.

9. CNLD cun miphun damnak policy a neihcia tikah, cupawl cu atakih cangsuak dingah Central khalah a dinpi rupro thei thlang ding. Chin damnak policy kengtu a si tikah, Kawl party ih dodal le eltai theih a si nawn lo ding. 10. Lamzin, lilawn, meisa, tidai le thansohnak tinzareng in a kentel ruangah, mithmuh thansohnak khal maktarai in a fehpi cih thei ding fawn. 11. Tuihlan ih Chin ram le Chin miphun ih neih dah lo, thil danglam pakhat sangsang cu a buaipi hrimhrim ding ti khal amahkhan ngam a si.
12. Zalennak, federal lamzin ah in fehpi cetco cih ding fawn. Ka sim rero zo, CNLD cun miphun damnak le miphun thansohnak a kop in a kengtel a si. NLD cun Chin miphun damnak sihte sufir tiat khal a pai lo kan ti zo kha. Tlangoi thu ih thansoh vivo nak hi NLD ih neihsun policy a si.

13. Cozah thianghlim, Cozah tha~ Eiruknak le mipi siatsuah thei le Chin siatral theinak dan fate siava pawl hlon hlo in, Chin miphun zinledan thawn milmi dan thianghlim pawl sersuah thei a si ding. 14. Ramsung ralbuainak a dai ding, leiram buainak a reh ruori ding, ramri thu tifel thei zuam vivo a si fawn ding. Biaknak, nunphung le calai zalennak maktarai a thlenpi thei faen ding. Hipawl hi miphun dam hrih lo, Chin miphun ih tulbik pawl an si.

Na Duh na hril thei~ Kawl party hi Chin miphun damnak hrangah pawk tlak, thlun tlak, vote tlak in na hmu maw? Sannak: A teuh lo nasa ke. Kawl party cu kawl miphun uknak sauternak, an Lal ram hngetkhot sinternak le anmah kawl hrang dam sunzomnak hrang lawngah a thabik. #Chin hrang ahcun, cancer natnak vek, Chin damnak lamzin daltu “virus” diktak sawn a si famteh!

NLD ah Chin thotho an si, an tlin thei cun a poi lo tivek hrawnghrang khawruah, hmuhdan le ngaihdan tivek men kha cu~ Miphun dam lo Chin kan si timi theih lo thu, #kawl an dam zo timi theih lo thu, pakhatkhat hlawknak vial zoh tuk thu, asilole ka sungkhat, ka unau, ka hrinpi, ka pengpi, ka khawpi tivek hrawnghrang vial thei ih, miphun huap hruaitu le Chin miphun thupitzia thei hrih lo lawlaw pawl khawruah, hmuhdan men fang a si ding. Catialtu: Lal Than Mang

By Chuncha