Cheuhra Cheukhat cu Sinaitlang Nawlbia Asi; Zumtu tampi BIATAK kan hngalh lo ruang ah Nawlbia sal ah kan lut than i chiatserhnak tang ah kan um.Jhn 8:32 ah Biatak kha nan hngalh lai Biatak nih an luatter hna lai a ti. Biakamthar zumtu nih Pathian chaw kan pek tik ah Isrealmi phunghlun in kan pekawk a si lo timi Biatak kan hngalh lo caah Nawbia sal ah kan va lut than i chiatserhnak tang ah kan lut than.Kal 3:10 ah, Nawlbia tuahsernak tang i a ummi hna cu chiatserhnak tangah an um, a ti.


Cheuhra cheukhat a thawknak, Gen 14:20 ah Na ral an tei tertu cungnungbik Pathian cu Thangthat si ko seh. Abram nih ral teinak in a kir lei ah hranchaw a lakmi cheuhra cheukhat Melkizedek tlangbawi sin ah amah lung tho ten a pek.
Pathian nih a halmi a si lo. Cheuhra cheukhat cu ka pe u tiah halmi a si lo.Abram nih ral na ka teiter ah cun kan pek lai tiah aa kammi a si. Cucah Judah mi pauhpauh nih cheuhra cheukhat an pek. Cuticun an pek lengmang i a hnu ah Pathian nih Nawlbia ah a hei nemngeh piak hna khi a si. Leve 27:30, 34, ah Ram chungmi cheukhat vialte, lo i a chuakmi thil zong theitlai zong JEHOVAH covo a si i Jehovah caah a thiangmi a si.34, ah Mah hihi Sinaitlang ah Bawipa nih Isrealmi hna caah Moses a pekmi nawlbia a si tiah kan hmuh.Cucaah Cheuhra Cheukhat cu Sinaitlang Nawlbia a si kan tinak cu.


Pathian nih Isreal miphun Amah mifa an sinak hmelchunhnak le chingchiahnak a pekmi cu, Sabath, Cheuhra Cheukhat, Cuarpar Tan. a sinak Deotronomi chung ah kan hmuh. Cucaah Krih a rat tthan hlan tiang Isreal zumlotu nih an zulhawk phung Nawlbia a si.
Judahmi phungbia cawnpiaktu le Frasi pawl nih kan phung Sabathni na buar kan nih hi zei hmeichunhnak dah na kan pek lai tiah Zisu an hal. Zisuh nih, Jonah hmelchunhnak dah tilo cu hmelchunhnak dang zeihmanh pek an si lai lo, tiah a ti hna.Zisu nih a chim duhmi cu ka phun hawi Judahmi Pathian fa nan sinak hmelchunhnak cu Sabath ulh,Cheuhra cheukhat pek, Cuarpar tan hi a si.Sihmanhselaw cutin a si ti lai lo Jonah cu ngapi paw chungah nithum le zanthum a umbang vailam ah ka thi lai i nithum hnu ah ka tho than lai cucu a zummi pauh Pathian fa an si cang lai tihi a chim duhmi a si. Cucaah Biakamthar zumtu piangthar caah Nawlbia phung kan ngei lo.

Phunghlun Nawlbia le zulhphung cu Kal 3:19 ah, Nawlbuarnak ruang ah cithlah a rak langh hlan i biakammi chaptu ah a ummi a si. tiah kan hmuh. cithlah timi cu Judah phun chung in mi khamhtu kan Bawipa Krih Zisu hi a chim duhmi a si.Cucaah Nawlbia cu Zisu a langh hlan ca lawng a si tinak a si.
Cathiang chung ah Jentelmi cu phungleng ummi thlarau lei ah a thimi nan si a kan ti.Rom 3:10 ah, Jentelmi nih Moses Nawlbia an ngei lo, tiah kan hmuh. Zumhnak kan ngeih khawh nak zong Penticost hnu Cornilia inn in Thiangthlarau kan coi zumnak kan hun ngeihkhawh ceu khi kan si. Lam 10:44-48. Zumtu tampi nih Mt 23:23 Zisu nih cheuhra cheukhat pe u a ti tiah an lak. Frasi pawl an depdet nak le zumhtlak an si lonak,an dinfellonak ah a mawhchiatnak a si.Judahmi an si caah cheuhra cheukhat cu fa an sinak hmelchunhnak cu thlahdorh lo ding in a chimmi a si.Biakam thar zumtu he pehtlaihnak zeihmanh a ngei lo.


Biakamthar zumtu Nawlbia thar a kan peknak,Mt 22:37- 40, Bawipa na Pathian cu na lungthin dihlak,na thlarau dihlak,na ruahnak dihlak in na dawt lai. tiah a ti.Minung kan ruahnak dihlak le kan thinlung dihlak hi kan chawva hi an si ko.Dihlak pek a kan fial.Chawva pek kong ah Zisu nih hitin a chim. Nan orhlei kut nih a tuahmi kha na kehlei kut theihter hlah,nan thilpek ah sumsel thawng thanter hlah u a kan ti.Nihin zumtu thlilpek thawng a thanning hi Zisu a hna a chehtuk lai hi na ruat bal maw?
Genesis chung ah vawlei a um chung pauh tuh can a um lai i zuun caan a um lai ti kan hmuh. Mala 3:10 cheuhra cheukhat in ka hneksak tuah u ti cherhchan na tlaihmi hi hneksaknak le Pathian sin ah leiba in ka pekmi si ti hi na fiang maw? Mt 3:7 ah Bawipa na Pathian cu hneksak hlah,” tiah kn hmuh.Leiba na pekmi khi na sin ah a kir tthan ti maw?Cheuhra cheukhat leiba ka pek khawh caah ka sin ah thluachuah a kirthan tiah na ruah ahcun zumlotu zong an rum ve ko silo maw? Zei lungthin in dah cheuhra cheukhat hi na pek? Pawl nih Biakamthar zumtu peknak a kan cawnpiakmi, IIKor 6-7 ah, A sinain hihi ka chim.Tlawmte a tuhmi nih tlawmte a zuun lai tampi a tuhtu nih tampi a zuun lai.Cuticun mikip nih sian lo buin pe loin,pek lo khawh lo i ruah ruang i pe loin,a lung in a timhning cio in pe seh.Zeitintiah Pathian nih cun lungtho te i a petu kha a dawt hna tiah a kan cawnpiak.Cucaah Nawlbia phung in na pek ahcun Nawlbia sal chiatserhnak tangah a ummi kan si tinak a si.
A suallio ah an tlaihmi minu Zisu sin an ratpi. Moses Nawlbia in lung in kan chep lai maw? tiah Zisu bia an hal. Zisu nih sualnak ngeilomi nih chep hmasa seh tiah a lu a khun i a zoh duh ti hna lo.Nawlbia lung an hlonh dih hnu lawngah Zisu nih a lu a tun kha ruat hmanh.Cheuhra Cheukhat Nawlbia pakhat te ka ni tlaih i Zisu hmai i kan dir ko ah hin Zisu nih zoh a kan duhlo hi ka ni fiang maw?Nawlbia cu Zisu sin a kan phanhpitu a si.Zisu sin a phan cangmi piangthar cu Nawlbia nih a zaamtak dih awk a si.An lung an thlakdih i an zaam dih hnu ah Zisu nih zaangfahnah in khamhnak a pek ko kha!Nawlbia nih an zaamtak cang maw?
Mt 9:13 ah,Kan Bawipa Zisu nih, Raithawinak si loin zaangfahnak ka duh timi sullam hi va cawng u. tiah a ti. Raithawinak cu Nawlbia zulhphung ziaza kha a chim duh mi a si. Zaangfahnak cu Biakamthar phung veelngeihnak ziaza kha a si.Peknak kong ah veelngeihnak ziaza nih cheuhra cheukhat pek in a kan cawnpiak lo. Sianlo buin pe loin,lungchung i timhning in,peklo khawh lo i ruah ruang i pe loin,tlawmte a tuhmi nih tlawmte zuun, tampi a tuh mi nih tampi zuun ti lungput he lungtho tein Pathian chaw kan pekawk a si hi kan cawn cio ding ah Krih min in kan sawm hna. Nawlbia sal in kan luat lai. Hi Biatak a reltu nan dihlak cung ah Pathian kan Pa le kan Bawipa Krih Zisu nih veel le daihnak in pe ko hna seh. A men.

Credit: Suikungpa

By Chuncha