Pathian a um: Daniel 2:28 ahcun “vancung ahkhin biathli phung khotu Pathian pakhat a um”. Bia. 1:4 “Atu i a um liomi le a rak um cangmi le a um lai ding a simi Pathian”. “Vawlei hi ser a rak si hlan ah Bia cu a rak um cang, cu bia cu Pathian sinah a um i cu Bia cu Pathian a si (John 1:1). Zei zong vialte sertu a si: Pathian cu lei le van le zei zong vialte sertu (Creator) a si (Gen. 1&2). Nehemiah 9:6 “Nangmah lawnglawng hi Pathian cu na si. Nangmah nih van le a chung ummi vial te na ser hna. Cun vawlei le a chung ummi vial te zong na ser hna”. Cucaah Khrihfa pawl nih sertu a um i umtertu a um ti cu kan zumhnak hrampi cu a si.

Zei zong vialte ngeitu (Owner) a si: Pathian nih, “vanrangtawi i a ummi vialte hna hi keimah ta an si” (Job. 41:11) a ti. Cucaah Sam catialtu nih: “Lei le van i a ummi thil vialte hna hi na ta an si” a ti (Sam 24:1). Cun Deut.10:14 zongah “Van i a sanbiknak hmun khi Bawipa ta a si. Vawlei le a cung thil vialte hna hi Amah ta an si” a ti. Sam 24:1 “Vawleicung pumpi le a chung ummi vialte hi Bawipa ta a si” a ti ve. David zong nih “ka ngeihmi vialte cu nangmah nih na ka pekmi a si” a ti (1Chan. 29:14). Paul zong nih “na ngeihmi thil vialte hna hi Pathian nih pekmi a si” a ti (1Kor. 4:7).

Kan pekmi cu ngeitu sinak langter a si: Cuti Pathian sinah thil pek kan ti lioah ri khiahmi cu cheuhra ah cheukhat a si. “ram chung thil cheuhra ah cheukhat vialte cu thlakmi thlaici a si ah, theitlai a si ah Bawipa ta a si (Levitikas 3):30) a ti. “kum fate in lo in a chuakmi nan thlaici theipar vialte cu cheuhra ah cheukhat nan pek chanh lai” (Deu. 14:22). “Ka hneksak tuah ngat u, van innka cu kan hunpiak hna le hunpiak hna lo (Malakhi 3:10).

Dinnak le felnak, thianhlimnak nun he pek ding a si: Cathar chan zongah pehzulh tein an rak pek (Mtt. 23:23). 1/10 pek donghternak Bible ah a um lo. A mah belte Pathian sin thil kan pek ahcun a za ti si loin dinnak le felnak, ngaihchihnak lungput zong ngeichih dingin cawnpiak hna. Ngaichihnak, dinfelnak tel loin peknak men nih Pathian lung a tawng lo tinak a si.

Zumtu pawl nih cheuhra ah cheukhat le thawhlawm kan pekmi nih hin Pathian a um (existenced of God), kan Pathian cu a nung (The living God) ti langhtertu a si. Zeicahtiah a um lomi cu pek a hau lo. Pek phung zong a si lo. Cucaah cheuhra ah cheukhat pek a hau lo ti cawnpiaknak hi Pathian a um lo ti cawnpiaknak a si. Pathian a zum lomi nih cheuhra ah cheukhat an pe bal lo. Zum lotu hmelchunhnak a si. By Rev. Zathat Chuntei