2020 Thimnak Ah Cun A Lai Ah A Ummi Pawl An Biapi Te Ttheo Lai; A ra laimi 2020 kum Chin ramkulh thimnak ah a biapi te hnga dingmi hna cu a lai ah a ummi pawl si te dawn an si. 1. A cheu cu party kong ah an dirhmun a fek rumro—CNLD, NLD, USDP le zei party paoh an si ah. Aho nih zei an chim zong ah anmah le ttanhmi party pin cu a dang party in MP aa cuhmi hna kha thimfung pek an tim hna lo.


2. A cheu cu an khua cungah an dirhmun a fek. Aho an si le a zei party an si zong ah anmah khua mi te MP ah an i cuh ahcun amah kha thimfung pek an i tim diam cang. An dirhmun a fek cang. 3. A cheu cu an tlang/peng cungah an dirhmun a fek ve cang. Aho an si le aho party an si zongah anmah tlang/peng mi te chung in MP aa cuhmi kha thimfung pek an i tim diam cang.


4. A cheu cu chungkhat le chungkhar kong ah an dirhmun a fek diam ve cang. Aho party an si, aho an i cuh, aho pengtlang mi an si zong ah, cun anmah khua le pengtlang mi te an si zongah an chungkhat le chungkhar chung in MP an i cuh ve cang ahcun amah sinah an thimfung kha an thlak ve diam cang. 5. A cheu cu MP aa cuhmi pa/nu he hawikom an si caah maw, a rak i bawmchan balmi an si caah maw, theihhngalh an si caah maw, amah kha thimfung pek an timh diam ve cang.

A cunglei panga chungah aa telmi pawl khi cu an dirhmun thlen a har ngai cangmi an lo. Cucaah a ra laimi Chin ramkulh thimnak ah cun a cunglei panga chung ah aa tel lo mi le a lai ah a ummi hna nih aho dah thimfung an pek te lai timi hi biapit ngai dawh a si. Catialtu: Nathan pa LD Hmung

Note: Mipi Sinah Lawmhnak le Zaangfah nawlnak: Ka thawngpang (News) ka ttial mi a rel mi vialte mipi nan dihlak cungah ka lunglawmnak nan sinah ka langter. Ka thawngpang ttialmi na kan rel piakmi ruangah keimah zong thawngpang a dikmi le a hmanmi ka post khawhmi a si. Thawngpang kan tial mi hi kan Mipi caah tha hnemnak a chuahpi ding tial hi a pakhatnak ah kan i timh bikmi a si.

Thawngpang (News) kan lakmi hi thatein source dang ka zoh hnuah mah hi cu a hmanmi a si lai tiah ka ruah mi hna hi ka miphun a si mi “Chinmi” caah tial khawh le theihter khawh ka rak I zuam. Asi nain vawlei cung cu tlamtlinglonak a si caah Source ka lakmi ah a hman lo mi zong a um kho caah cu a hmang lo mi a si tiah nan theih mi cu zeitik caan poah ah ka theihter uhlaw keimah ca zongah ralrinnak caah a si lai i cu thawngpang a hmanmi le a dik mi cu remh le tial khawh kan i zuam cawlh than ko lai. Cu caah ka Miphun hawi hna nangmah bawmhnak zong ka herh hringhran. Thawngpang tial piak na duh sual zongah zeitik caan poah ah tial piak khawh zong na si tiah Zaangfah nawlnak he- Lungleng Tlang Editor

By Chuncha