2020 Thimnak Ah MP Ah Thimtlak Mi Hna (Dalhnihnak); Nizan ah VP Henry Van Thio le Kanpalet in Amyotha Hluttaw hmunhma in MP aa cuh ding Salai Myo Chit hna MP ah thimtlak an sinak kan rak langhter. Atu tan ah Dr. Aye Aye Ngun le Salai Van Bawi Lian kong kan rak langhter.

3. Professor Aye Aye Ngun, PhD; Hakha peng in Amyotha Hluttaw in MP aa cuh dingmi a si. Kan Chin nu ah cun atu lioah amah bantuk hi cu har ngai dawh an si. Mandalay University in Master a dih, vaweicung le Asia ram sianginn ttha bik pakhat ah aa telmi Kyoto University in Master a dih, Ireland ram Dublin Metropolitan University in PhD a hmuh. Chinram ah kan ngeih hmasa bikmi Hakha College ah Principal a ttuan hmasa bikmi a si.

2020 thimnak ah a lutmi nu vialte lakah amah tluk in a za mi an um lo tiah ti khawh a si. MP ah a tlin ahcun Amyotha Hluttaw ah rian pipa a tlai kho ding a si. Hei chim ko ahcun Minister of Education maw, Deputy Minister maw a ttuan kho ding a si. An pek lai tinak si lo in a pumpak sinak in pek tlak a si tiah chim duhmi tu a si.

Amah a thimtu ding Hakha peng caah siseh, Chinram caah siseh bia tampi a chim kho ding a si. Amah a zuam cawhtu ding hna he zoh tti tikah amah hi Hakha peng caah le Chinram caah MP caah thim tlak a si.

4. Salai Van Bawi Lian; Thantlang peng in Pyituh Hluttaw in MP aa cuh dingmi a si. Asia ram sianginn ttha ah telh zungzal a si mi Chualalongkorn University in tthanchonaklei he pehtlai in Master a dihmi a si. Atu tiang a biachim, a cawlcanghnak le a raltthatning zoh tikah MP ah thim tlak taktak a si.

Thantlang peng caah siseh, a umnak Hakha caah siseh, Chinram caah siseh, Kawlram Federal hmuh khawh nakding caah siseh a chimrel kho ngai ding pasal a si. A bik in cozah a tlaimi hna an rianttuanning a hman lo tikah ral ttha tein a chim ngam dingmi a si lai tiah zumh a um. Thantlang peng i amah he Pyituh Hluttaw ah aa cuh hnga dingmi hna he zohtti tikah amah hi MP caah thim tlak bik tiah ka ruah. Cucaah Thantlang peng ummi hna nih khurkhua fak deuh in an ruah khawh ah cun MP ah tlinter tlak a si.

Credit: Nathan Pa Ld Hmung

By Chuncha