2020 Kawlram thimnak ah Zeidah cang kho timi tlangtar in October 2019 ah ka rak tialcang mi article a zuammi nih rel khawh than a si. Biahmaithi: 2020 thimnak ah zei party nih dah teinak a co lai? 2015 bantuk in party pakhat lawng nih teinak a co lai maw? Party pakhat lawng nih cozah a ser kho lai maw? party pakhat lawng nih a tei lo ahcun Party komh cozah an ser lai maw? zei party dah teitu a si kho, zei party dah cozah a si kho? Tlangcung mi nih Union Party tel loin cozah an ser kho maw? Kawl rawn party nih tlangcung party tel loin cozah an ser kho ve lai maw? zei party hmanh nih teinak tlamtling an co lo ahcun zeidah a cang kho” timi hi ruah phu, theih phu le hngalh phu hrimhrim a si.

Kawlram Thimnak Tuanbia Tawi: 1988 kawlram pumpi in democracy duhnak langhter hnu ah ralkap cozah nih ram pumpi thimnak voi thum an tuah. 1990 ah voikhatnak, 2010 ah a voihnihnak, 2012 ah a voi thumnak caan karlak thimnak le 2015 ah ram pumpi thimnak rak tuah a si. 1990 Kawlram pumpi thimnak ah NLD nih teinak a co. 1990 thimnak ah thutdan 492 a ummi chungah NLD party nih thutdan 392 an hmuh caah NLD nih zatuak 80% in teinak an co.

Ralkap rocotu party NUP nih thutdan 10 lawng a hmuh caah zatuak in 21.2% lawng a hmuh. 2010 ahcun NLD party thimnak a cuh lo caah ralkap rocotu party, USDP party nih zuam cawhtu ngei lo thutdan le zantim hnu ah lih le hrokhrol in chuahpi mi a hlankan thimfung in Pyithu hluttaw ah thutdan 440 a ummi chungah ralkap nih thutdan 110 an I laak cia caah, a tangmi thutdan 330 thimnak tuah ding a si nain shan ram thutdan 5 ah thimnak an tuah khawh lo caah thutdan 325 ah thimnak an tuah I, USDP nih thutdan 259 an an hmuh. Amyotha huttaw thimnak ah thutdan 224 a ummi chungah ralkap nih thutdan 56 an I laak cia cang caah a tangmi 168 ah thimnak an tuah I, USDP nih thutdan 129 an hmuh caah teinak an co. Cucaah USDP party nih Pyitaungsu hluttaw ah thutdan 498 an hmuh caah President le vice president an ngah pin ah ramkulh le ramthen vuancichuk vialte zong anmah nih an rak co dih.

NLD Party le Kawlram Thimnak: USDP nih 2010 ah teinak an co I, U Thein Sein cu president ah an thim. President Thein Sein nih Aung San Suu Kyi cu thong in an chuah I Aung San Suu Kyi he tonnak an ngeih hnu ah kap hnih lungtlinnak in phunglam zeimawzet an remh hnu ah 2012 Caan karlak thimnak thawk in NLD cu thimnak ah an hung lut. Thimnak a lawngmi thutdan 44 chungah NLD nih thutdan 43 an ngah I, a tangmi thutdan pakhat cu NLD candidate an hnon caah ralkap rocotu USDP party nih teinak an co.

2015 thimnak ah NLD party nih Amyotha hluttaw thutdan 224 a ummi chungah ralkap nih 24%[110] an laak cia caah thutdan a tangmi thutdan 168 chungah NLD nih thutdan 135 an hmuh caah 60.3% in teinak an co. USDP party nih cun thutdan 11 lawng an hmuh caah 4.9% lawng an ngah. Pyithu hluttaw thimnak ah thutdan 440 a umi chungah ralkap nih thutdan 25% [ 110] an laak cia cang caah a tangmi thutdan 330 lawngah thimnak an tuah I, NLD party nih thutdan 255 an hmuh caah zatuak 58% in teinak an co. USDP party nih thutdan 30 lawng an ngah caah zatuak in 30% lawng a ngah.

NLD cozah nih 2017 April ni 1, ah a voikhatnak caan karlak thimnak cu hmun 19 ah an tuah I, NLD party nih thutdan 9 an ngah. Cucaah NLD party nih zatuak in 47.4% an ngah. Asinain USDP party nih cun thutdan pahnih lawng an ngah caah zatuak in USDP nih 10.53% lawng an ngah tinak a si. Cucaah NLD nih celte in teinak an co.

NLD nih cozah a voi hnihnak caan karlak thimnak cu 2018 November thla ah thimnak an tuah than. Thutdan hmun 13 a lawngmi chungah NLD nih hmun 7 ah teinak an co. Asinain Rangoon ramthen Seihkhan Myone thimnak ah teitu a ngahmi USDP palai cu NLD palai nih election commission ah a dih lo ning in election campaign a tuah ti in report an tuah I, chekhlatnak an tuah hnu ah Election Commission nih NLD palai cu teinak an pek than caah NLD party nih hmun 8 ah teinak an hmuh than caah zatuak in 61.5% in teinak an co tinak a si.

2008 Phunghram Ning In Thimnak: 2008 phunghrampi cu President system le Parliament system cawh in sermi phung a si. 2020 November thla thimnak ah tulio cozah nih 2008 phunghram remh loin in thimnak an tuah ahcun Pyithu hluttaw le Amyotha hluttaw pahnih fonh I thutdan 333 a hmu khomi party lawng nih President an thim khawh lai caah cozah zong anmah nih ser khawh a si lai. Phunghrampi article 261 an remh lo ahcun President a ngahmi party lawng nih ramkulh le ramthen vuancichuk zong an tlaih dih fawn lai. Kawl rawn ah hin pyithu hluttaw le amyotha hluttaw fonh ah thutdan hmun 291 a um. Tlangcung mi umnak hmun ah pyithu hluttaw le amyotha hluttaw dihlak fonh ah thutdan hmun 207 a um. Cucaah tlangcung mi nih kan ngeihmi dihlak thutdan hi a dihlak in ngah dih hmanh usih law kan duhmi president kan thim khawh lo caah ramkulh le ramthen zongah cozah kan ser kho rih lai lo.

Kawlram President Thimnak: Pyithu hluttaw ah thutdan 440 a ummi chungah, thutdan 330 cu mipi nih thimmi an si. A tangmi thutan 110 cu ralkap nih thim hau loin an I laakmi thutdan a si. Amyotha hluttaw ah thutdan 224 a um I, thudan 168 cu mipi nih thimmi a si. A tangmi thutdan 56 cu ralkap nih thim loin an I laakmi a si. Pyithu hluttaw le Amyotha hluttaw pahnih fonhmi, pyitaungsu hluttaw ah thutdan dihlak 664 a um, mah chungah mipi thimmi thudan 498 a um I, ralkap nih an I laakmi thutdan 166 a um. President thimtu ding cu pyithu hluttaw le amyotha hluttaw pahnih komhmi, Pyitaungsu hluttaw palai 664 nih thim a si.

Pyitaungsu hluttaw [ amyotha hluttaw+phithu hluttaw ] chungah a ummi thutdan 664 chungah ralkap nih 166 an I laak cia cang caah mipi nih thim dingmi thudan cu 498 lawng a tang. Mah chungah Kawlrawn [ ramthen] ah thutdan 291 a um I, tlangcung ramkulh [ state ] ah thudan 207 a um.

Kawlram President thim khawhnak dingah pyitaungshu hluttaw [ Pyithu hluttaw + Amyotha hluttaw ] ah thutdan 333 ngeih a herh. Tutan thimnak ah thutdan 333 a hmu khomi party an um ahcun party dang sawm hau loin anmah duhnmi president an thim khawh pin ah anmah duhning in cozah zong an ser khawh lai. President thim tik ah Ayotha hluttaw nih pakhat, ralkap nih pakhat le hlutaw nih pakhat cio an chuahpi hna lai i, thimfung tam bik a hmumi kha President ah thim a si te lai. A dang pahnih cu an thimfung ngahmi tlawm le tam in Vice President 1, le Vice Preisent 2 an si lai.

NLD Nih Teinak A Co Lai Maw?: NLD party nih cozah an ser khawhnak dingah pyitaungsu hluttaw [ Amyotha +hluttaw] ah thutdan 333 a hmuh a herh. 2015 ram pumpi thimnak ah NLD nih pyitaungsu hluttaw [ Amyotha+Phyithu hluttaw] ah thutdan 390 an ngah caah fawi tein an duhmi President an thim khawh. President thimnak ah a herhmi thutdan 333 pin ah a hlei in thutdan 57 an hmuh. NLD nih a hleihluat in an rak ngahmi thutdan dihlak 57 sungh dih ding zong hi a fawi lomi a si. A hleihluat in an ngahmi thutdan 57 dihlak an sungh ko hmanh ah 333 an hmuh rih ahcun aho party sawn hau loin NLD nih President an thim khawh lai caah cozah zong anmah nih an ser khawh thiamthiam lai. Kawlrawn ramthen ah a ummi hluttaw thutdan dihlak 291 chungah NLD nih thutdan zeizatdah an hmuh khawh lai I, tlangcung mi umnak ramkulh chungah a ummi hluttaw thutdan 207 chungah NLD nih hluttaw thutdan zezatdah an hmuh khawh lai timi hi a biapi ngaingai mi a si. Kawlmi umnak kawl rawn koko ahcun NLD party thiamthiam nih teinak a co lai tiah ka zumh. A tlawm lei le a tam lei lawnglawng a si ko lai. Keimah zumhning ahcun thutdan 270 hrawng a hmuh lai i a taangmi hluttaw thutdan 21 cu USDP party le a dang Kawl party fa tete pawl nih an co lai tiah zumhnak ka ngei.

Asinan tlangcung mi umnak ramkulh chungah NLD nih 2015 tluk in teinak a co ti lai lo tiah ka zumh. Asinain Kawl milu an chahnak, Mon, Karen, Kaya, Shan le Kachin ramkulh ahcun a za tawk in thlutdan zeimawzet an laak kawh lai tiah ka zumh. Tlangcung mi hmun ah a ummi thutdan 207 chungah NLD nih thutdan 63 an laak chap a si ahcun NLD nih teinak an co than lai. NLD nih tlangcung mi hmun ah thutdan 63 an laak khawh lo ahcun tlangcung mi party he fonh in cozah ser khawh a si. Mah cu tlangcung mi party hna nih an I tinhmi zong a si kho. Asinain NLD party nih tlangcung mi party kip in cozah ser dingah an sawm lai ka zum lo. An herh taktak mi hna lawng an sawm khawhmi hna a si. Hlan lio tein , hawikom an sermi hna, UNA party pawl he komh in cozah a ser hmasa lai tiah zumhnak ka ngei. UNA party he komh in thutdan a zaat lo hnu lawngah a dang party sawm an si lai tiah ka zumhning a si.

USDP Party Nih Teinak A Co Lai maw?: USDP party nih 2020 thimnak ah Pyitaungsu hluttaw ah thudan 167 an hmuh khawh ahcun mipi thim lomi, ralkap thutdan 166 he ikomh in thutan 333 an hmuh khawh ahcun an duhmi president an thim khawh pin ah an duhmi cozah zong an ser khawh ve lai. USDP party cu ralkap nih dirhmi, ralkap rocotu a si caah ralkap he fawi tein an i komh lai tiah zumh a si. USDP party nih ralkap thutdan 166 kha an I bochan caah adang party nakin cozah ser khawhnak dingah lam a fawi ngaingai. Asinain USDP party nih 2015 thimnak ah thutdan 41 lawng an hmuh caah 2020 ah thutdan 166 hmuh khawh ding cu a si kho lomi ah ka ruah. A tam bik an hmuh ah thutdan 70 hrawng lawng an hmuh lai tiah zumhnak ka ngei. Cucaah USDP le ralkap ikawmh in cozah ser ding cu fawi dawh a si lo. Asinain tlangcung party hna nih ralkap le USDP he ikomh in cozah ser an duh ahcun phundang a si hnga. Asinain democracy le federal a duh taktak lomi, ralkap pawl hluttaw chungah chap hmanh a duhmi, tlangcung mi hriamtlai hna he a kap cuahmah mi hna he ikomh ding cu tlangcung mi party nih an duh lai ka zum lo.

Tlangcung Mi Party Nih Teinak An Co Lai Maw?: Tlangcung mi party hna nih 2015 lio ah an tonmi sunghnak kha experience tha bik ah an I laak caah biatak tein an I remh. Party a rak I komh kho lomi an I komh. Teinak hmuh duh ah an I komhmi a si. Tlangcung mi nih President a thim khotu thutdan [ amyotha+pyithu hluttaw] 207 an ngeihmi a dihlak in teinak an co dih hmanh ah anmah tein president thim khawhnak thutdan 333 an tlinh kho thiamthiam lo. Cucaah Union Party asiloah Kawlrawn party kan timi hna nih Kawl rawn MP thutdan 126 an bawmh lawngah tlangcung mi nih an duhmi President an thim khawh lai I, tlangcung mi umnak state kip ah an duhmi vuancichuk an thim khawh lai. Cucaah tlangcung party nih 100% in teinak an co khawh hmanh ah 2008 phunghram ning in cun Union Party asiloah Kawlrawn party tel loin cozah an ser kho lo. Cucaah tlangcung party hna nih a donghnak ahcun Kawl rawn ah teitu a co dingmi, NLD party he an i komhh thiamthiam te lai tiah zumhnak ka ngei.

Biafunnak: 1990 thimnak ah NLD nih teinak a co. 2010 thimnak ahcun NLD party thimnak an I cuh lo caah USDP party nih teinak an co. Asinain 2012 caan karlak thimnak, 2015 ram pumpi thimnak , 2017 caan karlak thimnak le 2018 caan karlak thimnak zoh tik ah NLD party nih teinak an co thiamthiam ,a tlawm le a tam lawng a dang. A ra laimi 2020 thimnak zongah NLD party nih teinak a co rih lai, a tlawm le a tam lawng a dang rih lai. 2015 thimnak ah hin tlangcung party nih pyitaungsu hluttaw ah thutdan 57 lawng an hmuh. Asinain 2020 thimnak ahcun an thawn deuh lai caah thutdan 100 tluk cu an hmuh khawh lai tiah zumhnak ka ngei. 2008 phunghram pohmah 261 ruangah, tlangcung mi nih mah tein CM thimnak nawl kan ngei rih lo. President thim khawhnak thutdan 207 lawng kan ngeih caah tlangcung party hruainak in cozah ser khawhnak lam a um kho hrimhrim lo. Tlangcung mi nih kan ngeihmi thutdan dihlak 207 zong a dihlak in tei dih ding timi zong a har ngaimi a si. Cucaah rampi cozah a ser khotu ding cu NLD party thiamthiam an si ko lai. NLD party nih President thimfung thla khotu thutdan 333 an hmuh khawh lo lawngah tlangcung party le a dang party cu cozah sertu caah sawm an si te lai. Cu dirhmun kan phak tik lawngah tlangcung party pawl nih an duhmi halnak nawl caantha an ngei te lai i, deal tuah khawhnak dirhmun an phan te lai. Mah dirhmun phak ding cu tlangcung party hna nih an chunmang a si. Mah zong cu NLD party nih an sawm hna lawngah a cang kho dingmi a si.

Politics cu chun zan in a thleng khomi a si. Politics ah full stop a um lo an ti bang 2020 phak hlan zongah zei paoh a cang khomi a si. Cucaah 2020 thimnak ah zeidah a cang kho timi cu 2020 thimnak kan tuah taktak hnu lawngah fiang tein kan theih khawh te lai. By Salai Lairamthang, August 18, 2019, Muko Mekazin September, 2019

By Chuncha