𝐁𝐢𝐚𝐡𝐦𝐚𝐢𝐭𝐡𝐢; Mikip nih Trump kan tanhnak le Obama kan huatnak kong hi cawhhrup in kan chim cio i a tha ngaingai tiah ka ruah. Kanmah le zalawnnak cio zong asi rua tiah ka ruah. Amah belte comments tu hna zapi zaran 90% tluk hi ka dothlat ning tawk ah Obama kan rak huatnak sullam hi dik hman tein a fianter kho lomi kan si rua tiah ka ruah.

Duhtuk mi a tlangval nih nungak pakhat phiat tikah nungak tampi hna cu lungfah lungin zeibantuk minung set asi I, minuncan zia atha maw a si, mitha lo dah, ti zong a chung muru nun taktak dothlat lemlo in tlangval pakhat sinah lungfah lungin sining dihlak pek a hmang mi ngaknu an tampi. A ngai tak lo ahcun nungak lungfim te asi ahcun zeiruangah ka darling nihin a ka then I zeitindah kan I kawp than khawh ning asi lai i, amah maw mawh deuh keimah deuh dah, timi hi thatein le dikfel tein a dothlat awk asi hnga.

Cubantuk thiamthiam in Former Pres. Barrack Obama kan huatnak a sullam hi a muru taktak khi thatein le dikfel tein kan dothlat awk asi ve rua tiah ka ruah caah a tawi khawh chungin ka vun fianter tuah hnik lai.

𝐎𝐛𝐚𝐦𝐚 𝐂𝐮 𝐀𝐡𝐨𝐝𝐚𝐡 𝐀𝐬𝐢?

Barrack Hussein Obama cu Pi Ann Dunham(white)le Pu Barrack Obama Jr (black) hna I pafa asi i August 4, 1961 ah Honolulu, Hawaii, USA, ah achuak. Columbia University ah BA adih hnu ah vawleicung sianginn thabik a rak si mi Harvard University ah upadi I a dih dong JD timi a rak dih. 20, January 2009 in 20,January, 2017 tiang US president a tuan.

𝐎𝐛𝐚𝐦𝐚 𝐂𝐮 𝐊𝐡𝐫𝐢𝐡𝐟𝐚 𝐀𝐬𝐢 𝐌𝐚𝐰?

President Obama cu Khrihfa asi ko timi hi a tuanbia le nihin tiang a dirhmun ah hmuh khawh asi. Chicago i a ummi Trinity United Church of Christ (TUCC) ah a rak thang lianmi asi. Kum 2008 hnu in an pastor Rev. Jeremiah Wright biachim sual ruangah biakinn a phan ti lo, tiah mitampi nih an ti nain kum 2016 lio Esther Sunday zongah an chung tein Virginia black Church ah an I pumh lio hmuh khawh asi.

Mitampi nih Obama cu Khrihfa asi lo tiin a phunphun in tette an langhter ko nain nangmah pumpak nih a kong fiang tein theih na duh ahcun,amah Facebook, Instagram le Twitter khi thatein va zoh law Pathian Bia he ai thenlonak tampi na hmuh ko lai. Amah belte Pu Zo Tun Hmung ti na cha in Church chiarman le Khrihfabu riantuan bantuk asi lo i USA president tuan cu, covo khat tein ngeihter a duhtu le upadi le thiamsang tuk asi tikah Khrihfa mit khat lawngin kan cuan ahcun Obama cu Zumtu asi lo, tiah sual nan phawt tak ko hnga.

𝐎𝐛𝐚𝐦𝐚 𝐍𝐢𝐡 𝐌𝐮𝐬𝐥𝐢𝐦 𝐑𝐞𝐟𝐮𝐠𝐞𝐞 𝐔𝐒 𝐀𝐡 𝐊𝐡𝐚𝐡𝐭𝐞𝐫 𝐀𝐭𝐢𝐦𝐡 𝐌𝐚𝐰?

UNHCR nih a langhter ning ahcun kum 2019 tiang ahkhan vawleicung ah ralzaam (Refugee) 70.8 million an um. Syria, Afghanistan, South Sudan, Myanmar, Somalia, Sudan le Democratic Republican of the Congo, ram 7 hna hi vawleicung ralzaam 67% zatuak an si a ti. Hi ram 6 hi vawleicung sifak bikmi le a buai bikmi le Muslim ram lawnte an si.

Kum 2001 hnu ah US nih Muslim ralzaam a lak tamcem hi kum 2016 lio ahkhan asi i, hihi vawleicung ram buai bikmi le ram sifak bikmi top 5 ah ai tel pengmi Somalia pawl tampi a rak lak hna tan kha asi. Muslim 46% rak lak an si i, Khrihfa 34% tluk kum 2016 lio ahkhan rak lak an si ruangah President Obama cu an rak thangchiat tuk hringhran dohdaltu hna nih Muslim asi titiang in an ti phah. A ngaitak loah cun 1, Oct, 2001 in 30 Sept,2019 tiang ah Khrihfa ralzaam (Refugee) US a lutmi 464,700 an si I Muslim razaam (Refugee) US a lutmi 310,700 an si, tiah Pew Research nih a langhter.

Asi ahcun US president hei si law thleidannak a ngei lomi le upadi leiin JD a dihmi hei si law, vawleicung Ralzaam 70% cu Muslim an si, vawleicung ramdifak bikmi top 20 cu Muslim ram, vawleicung ram buai bikmi cu Muslim ram asi I harnak fakbik a tongmi hna pawl cu Muslim nan si ai tiin hnawn riangmang in Khrihfa lawng na la kun ne lai maw? 2018 USA -Muslim cazin ning ahcun US Muslim dihlak hi 3.45 million an si I percentage tuak ahcun 0.8 lawng te bak an si diam I Obama nih Muslim tlawmte a lak ruangah US ah Muslim khahter dih a timh, timi cu zaanmang zongah manh khawh lo dingmi lih nak taktak khi asi hnga.

𝐈𝐬𝐫𝐚𝐞𝐥 𝐀 𝐑𝐞𝐦 𝐇𝐧𝐚 𝐋𝐨 𝐀𝐬𝐢 𝐋𝐨

Palestinian pawl le Israel pawl buainak hi kan Bible chan tein asi cang caah chim fian khawh meimei ding asi lo. US presidents paoh nihcun Israel cu tanh dih cio asi ko. Asinain nannih Palestinian pawl these ramcer ah khua sa ulaw ISRAEL pawl hi hmuntha ah um hna seh ti thlu awk an tha ve lo, ISRAEL duhning in a sithlu kho lo bantuk in Palestinian pawl duhning zongin asi thlu kho ve lo, vawleicung buainak ah UNO pi nih a tolrel ai har bikmi buainak asi hihi.

14, Sept,2016 lioah Israel hi raal hriamnam caah $ 38 billion bak a rak bawmh hna i cucu US tuanbia ah a um bal lomi mi bawmhnak asi. Vawleicung raalhriamnam sernak caah phaisa a hmang bikmi top 11 asimi Brazil nih kum khat caah a hman mi nakin a tam deuh hnga. Culawng cu siloin US nih an I uak tukmi vawleicung raltuknak vanlawng thabik F-35 Lighning 4 bak England le Canada hmanh nih an ngeih hlan ah an cawk ter ko hna.

President Donald Trump nih Jerusalem cu Israel khualupi ah a pompi ko nain midang nih an pompi duh ve lo ahcun sullam aum hlei hnga lo. Cun pompi vial lawng asi i Ambassador zung a va sak vial lawng nih lai a rel lo, cun nakin a biapi deuh mi Pathian nih a siam mi te asi ve mi Palestinian pawl he Zeitindah an I rem ning dingin ka tolrel lai, ti deuh kha biapi cu asi hnga.

𝐎𝐛𝐚𝐦𝐚 𝐂𝐮 𝐑𝐚𝐥𝐡𝐫𝐚𝐧𝐠 (𝐀𝐥-𝐐𝐚𝐢𝐝𝐚, 𝐁𝐨𝐤𝐨 𝐇𝐚𝐫𝐚𝐦, 𝐓𝐚𝐥𝐢𝐛𝐚𝐧 𝐥𝐞 𝐈𝐒𝐈𝐒) 𝐛𝐚𝐰𝐦𝐭𝐮 𝐚𝐬𝐢 𝐥𝐨

Ralhrang phu hi an tamtuk ka tial cawk in an riantuannak zong hi ka fianter cawk dih lai lo. Laimi nih kan theih bikmi Ralhrang ISIS, Al-Qaeda, Boko Haram le Al-sabet kong hi kut caangcan in vun fiamter ta ning.

ISIS hi an rak I hramthok taktak hi kum 1999 ah asinain January 1, 2014 ah biaktak tein Iraq le Syria ah ram an vun lak. IS Ralhrang minung thong tlawmte nih Iraq ralkap minung a tingin a tam mi le US hriamnam thatha ai ngeih mi fawi tein an tei khawh hna i Iraq khuapi nganbik pahnihnak Mosul an lak I Iraq ram 56,000 square kilometers pen I cucu Iraq ram hnarcheu tluk deng asi.

Anmah ram mi lila an thah hna, sual vialte lakah sual tuarh chuak loin an rorum. Iraq mipi an a bubu bakin an thah hna, an Ram thil tha vialte le zohdawh vialte zong an hrawh dih. An celh ti lo,cu lio I US president Obama sual an phawt na kap duh hna lo tiin. Asinain Iraq ah miphun tlawm deuh le biaknak tlawm deuh thleidannak a um I uknak luban vialte miphun tenau nih an tin ve lo tikah an lung a fak i biatak in ram caah rian an tuan duh lo hlei ah an rak an daw taktak lo, tiah President Obama nih a hmuh hna caah a zuan hnawh duh nai sai lo. Hi biaknak le kal Ning hi a hman lomi asi tiah mipi vialte an I fian dih cekcek hnu hmanh US ralkap Iraq ram caah raltuk a sian hlei lo, ral an tei khawhnak hnga training pek le hriamnam lawngin a bawmh hna.

Iraq mipi le Kurdistan vialte an lung a fim dih cikcek hnu October 16, 2016 ah Iraq ralkap, Palik le Kudist ralkap Minung 100,000 renglo cu ISIS an hram bongh dingin an i sersiam than I December 2017 ah an tei dih cikcek hna. Zeithei huaha loin Trump nih an ci a hmuh hna kan ti lengmang mi hi lih fangfak bak asi timi vun chim ka duh. A ngai taktak lo ahcun Trump nih Syria le Afghanistan i a ralkap pawl lakviar (withdraw) a rak i tim i raltuk lei a thiamtuk mi Secretary Of Defense James Mattis cu a duhlonak langhternak ah a rian in a rak i din phah. A cunglei adang pawl kong hi cu ka chim cawk ti lai lo hi kong cu za rih seh a fiang pah ko cang lai dah.

𝐍𝐚𝐮𝐡𝐫𝐚𝐰𝐡 𝐋𝐞 𝐍𝐠𝐞𝐢𝐤𝐡𝐚𝐭 𝐓𝐡𝐢𝐭𝐮𝐦𝐡 𝐊𝐨𝐧𝐠

President Obama nih US pumpi ah ngeikhat thitumhnak nan cohlan viar hrimhrim lai i nan duh paoh in nau nan hrawh lai, a ti bal lo. Ngeikhat thitumh cu nangmah duhthimnak asi ko, ti khi a si deuh. Zeitluk in pa style hmanh khi pa na si ahcun na duh hlei lai lo cuh, zeitluk in nu style hmanh khi nu na Si ahcun na duh ve hlei lai lo cuh. Nu na si ahcun pasal na ngei l Pa na Si ahcun upi na thi ko hnga lo maw? Nulenu palepa nan I um tengteng lai tiah a ti bal lo cuh. Kanmah Laimi lak hmanh ah nulenu le palepa ai umh mi an tamtuk zeitin nan khenkham hlei tung lo farasi pawl?

Nauthah zong hi mu ahohmanh nih an duhmi le an sian mi asi lo cuh. Na zawn a chuah ahcun na thah a hau caan a um men te lai cuh. Cu dirhmun na phak tikah thah ngah lo in ti hna sehlaw nangmahtu maw ma thih deuh ne lai? Khampat ah Tedim hna an um I an fanu hi thlano a faktuk I thii rawnlo ahcun a thi lai, tiah doctors te nih an ti nain, a nulepa hi Seventh-day ruh tukmi an si i thii rawnhnak cun thi ko seh, an rak ti i an rak thihter mi khi kan lawh ve cang lai cu mu. Cucaah hihi cu mah duhthimnak kha cozah zong nih a pom piak awk hrimhrim asi ko.

𝐏𝐫𝐞𝐬𝐢𝐝𝐞𝐧𝐭 𝐎𝐛𝐚𝐦𝐚 𝐇𝐢 𝐔𝐒 𝐏𝐫𝐞𝐬𝐢𝐝𝐞𝐧𝐭 𝐀𝐡 𝐌𝐢𝐧𝐥𝐚𝐧𝐠 𝐏𝐚𝐰𝐥 𝐀𝐬𝐢 𝐌𝐚𝐰?

US political science minung 200 nih US president ranking an thimmi top 10 chungah ai tel I, vawleicung laksawng lakah a ngan bik Noble Peace Prize hi US presidents lak a hmu kho mi cu Theodore Roosevelt, Woodrow Wilson, Jimmy Carter le Barrack Obama, minung pa li lawng an si rih.

Vawleicung upadi leiin a donghnak a simi Juris Doctor (J.D.) timi a dihmi asi i US president vialte lakah catang sangbik 5 lakah ai tel. Cu ve bantuk cun biaknak dang zong zalawnnak an hmuh bik lio caan asi ve.

𝐌𝐲𝐚𝐧𝐦𝐚𝐫 𝐋𝐞 𝐂𝐡𝐢𝐧𝐦𝐢 𝐂𝐚𝐚𝐡 𝐓𝐞𝐡 𝐀𝐭𝐡𝐚 𝐌𝐚𝐰?

US president nih Myanmar voihnih an tlawm hi a um bal theng lo, a mah thok in US le Myanmar pehtlaihnak hi hram vun sih hram ai thok. 1, Oct, 2001 in 30, Sept, 2019 tiangah US nih refugees vawleicung ramah a lak tambikmi hi Myanmar asi i minung 177,700 kan si I hi chung ahhin Chin mi le Karen kan tambik.

President Obama cu kanmah nih kan tahning le tanhning in rian va tuan lo hmanh sehlaw, vawleicung mipi nih an uar i Chinmi a kan daw biktu zong asi ko. Amah hi rak um hlah sehlaw nihin ah Chinmi hi hi dirhmun hi kan phan lai lo timi cu sehtan hmanh nih a el ngam lai ka zum lo. Cucaah na rak huatnak a ruang pawl thatein kan in fianter mi nihhin na lungfim nak in pe hram cang seh.

Chelsea Bawi
Admin

By Chuncha